На самиот старт на осминафиналната фаза од СП во Русија супер-дерби меѓу Франција и Аргентина. Франција предводена од можеби првата меѓу многуте ѕвезди Антоан Гризман ќе се обиде да ја изненади Аргентина, која водена од Лионел Меси едвај ја ппомина групата.
Аргентина сигурно дека не посакуваше во 1/8 финалето да има противник како Франција, но втората позиција на табелата во својата група ги однесе директно на мегдан против една од најквалитетните селекции во досегашниот дел од СП. Очигледно дека двете фудбалски велесили не ја имаат покажано својата најдобра слика на Мундијалот, па зато аможе да очекуваме дека на оваа средба ќе ги отворат картите и ќе играат добро. Дидие Дешамп на овој меч нема да може да смета на Бенџамин Менди поради повреда на мускулот, но се очекува да има одморен тим, ако се земе предвид дека против Данска во последното коло настапи со комбиниран состав.
Аргентина нема проблеми со повредите и се очекува на терен да истрчаат истите фудбалери што ја победија Нигерија за пласман во 1/8 финале. Сампаоли беше критикуван за менување формации, експериментирање со играчи од аргентинската лига, но во последното коло го сепак им даде доверба на играчите од Европа кои одлично се снајдоа во новата формација.
Овие две селекции досега имаат одиграно 11 натпревар меѓусебе, а статистиката е на страната на Аргентина, со шест победи. Во изминатите 32 години, двете селекции имаат одиграно само два пријателски меча, во 2007 и 2009 и двете ги доби Аргентина. Сепак традицијата е на страната на Франција, затоа што немаат пораз од селекција од Јужна Америка на последните осум натпревари на Светските првенства. Последен пат, загубиле во 1978 токму од Аргентина (1:2). Французите немаат пораз во осминафиналините средби откога се воведени (1986, 1998, 2006 и 2014 година). Аргентина има искуство со елиминациите, на последните пет Светски првенства играше во четвртфиналето. Натпреварот меѓу Франција и Аргентина се игра денеска од 16.00 часот на „Казан Арена“ во Казан.