Поранешниот италијански репрезентативец Андреа Ранокија одлучи да објави крај на фудбалската кариера. Причина за тоа е што се здобил со тешка повреда. Дефанзивецот има скршеница на фибулата и поради оваа причина прво ја напушти својата екипа Монца, а потоа објави дека трајно се повлекува од фудбалот. Тоа го направи со порака на Инстаграм.
„Имав среќа да го запознаам тренерот Пјетро Монтанели, кој ме откри како дефанзивец и ме трансформираше во фудбалер каков што бев до вчера. Им благодарам на сите тренери со кои работев во кариерата. Секогаш ќе ги паметам тие денови. Антонио Конте ме трансформираше мене и ми го смени начинот на размислување.Тој е тренер кој не те остава ист како порано.Имав среќа да работам со него и после тоа мојата кариера достигна највисоко ниво.Имав среќа да играм против најголемите и јас сум горд на тоа. Секогаш давав се од себе и му благодарам на моето семејство за поддршката што ми ја дадоа и за сите среќни моменти“, напиша Ранокија.
„Во последните година и пол поминав низ тежок период од мотивациски аспект, дури и додека бев во Интер. Монца ми понуди нова можност и добар договор и јас ја искористив. Во еден момент се почувствував празно и почнав да си поставувам прашања, а потоа дојде тешката повреда во Неапол, која би ме оставила надвор од терените со месеци. Размислив и решив дека штом клубот ми даде доверба, не можам да се потсмевам со него. Немаше ништо повеќе да му дадеме и се разделивме со Галијани како пријатели.Тој беше одличен господин и ме разбираше. Сега ќе направам пауза да се смирам, да ги средам овие емоции и во наредните месеци да донесам одлука за мојата иднина. Единствено е сигурно дека повеќе нема да играм фудбал“, додаде дефанзивецот.
34-годишниот дефанзивец помина 11 години во Интер, каде го постигна најголемиот успех во кариерата, откако еднаш го освои Скудетото, двапати го крена Купот на Италија и еднаш Суперкупот. Играше и за Перуџа, Арецо, Џенова, Бари, Сампдорија и Хал Сити. Покрај тоа, тој исто така одигра 21 натпревар за репрезентацијата на неговата земја.