Денеска на посебна средба со новинарите, претседателката на Федерацијата за училишен спорт, Елена Мицковска, денеска порача дека започнуваат со реализација на проектите за кои досега работеа во подготвителна фаза, а ќе претставуваат мега значајни манифестации за младинскиот спорт во Македонија.
Од 20 до 28 април во Скопје ќе се одржи Светското училишно првенство во ракомет, каде што играчите се на возраст до 18 години.

„Иднината на светскиот ракомет доаѓа кај нас и тоа е одлична шанса за нас да се докажеме како организатори. Како луѓе кои и самите потекнуваме од спортот, знаеме колку се вредни ваквите натпреварувања, каде што играчите не се усовршуваат само во спортот, туку учат и за нови земји, култури, толеранција и инклузија. Искрено ги замолувам сите спортски чинители да дадат свој придонес во што е можно подобро претставување на нашата земја“,– рече Мицковска, која се претстави како поранешна кошаркарка, спортски работник, но и дел од ФУСМ како професор по физичко образование.
Вториот мега проект е вклучувањето на Македонија во „Плазма – Спортски игри за млади“, што ќе донесе повеќе настани пред завршницата која е планирана во Сплит, кон крајот на летото.

