Македонската фудбалска репрезентација претрпе убедлив пораз на гостувањето кај Турција во вечерашниот пријателски натпревар во Истанбул. Избраниците на селекторот Гоце Седлоски беа поразени со 4:0 во натпревар во кој домашниот состав домијираше во сите 90 минути и практично не ни даде шанса да се надеваме на подобар резултат.
Турција брзо го отвори резултатот уште во 2. минута со голот на Кокчу, а во 16. минута веќе беше и 2:0 за домашните, откако Узун го матираше Димитриевски. Ние единствената шанса на мечот ја имавме во последната минута од првиот дел кога Алиоски доби одлична топка од Миовски, но не успеа да погоди.
Во вториот дел беа направени бројни замени, а Турција лесно дојде до два нови гола. На 3:0 зголеми Ѓул, додека четвртиот гол за Турците беше дело на фудбалерот на Галатасарај, Бариш Јилмаз.
За Македонија ова е втор пораз под водство на селекторот Седлоски. Во четири натпревари под водство на новиот селектор, Македонија се уште нема постигнато гол.

