Италијанската екипа Аталанта е на чекор да постигне еден од најголемите успеси во својата историја. Екипата од Бергамо е на 90 минути од пласман во 1/4-финалето во Лигата на шампионите уште во своето деби во елитното натпреварување.
Избраниците на тренерот Џан Пјеро Гасперини гостуваат кај Валенсија на „Местаља“ во реваншот од 1/8-финалето. Сепак, Италијанците се огромен фаворит да продолжат понатаму, откако во првиот натпревар на домашен терен остварија импресивна победа од 4:1.
Во исто време, Валенсија ќе мора да направи чудо доколку сака да оди понатаму во ЛШ. Иако им се потребни три гола, тоа не значи дека Шпанците немаат шанси да ги свртат работите во своја корист. Тие имаат една важна предност во однос на денешниот натпревар, што не треба да се потценува. Тоа е одличното искуство што тимот го има во настапите од Евро куповите. Понекогаш може да биде од голема важност на вакви средби.
Сепак, Валенсија нема да може да се потпира на својот голем адут, на својата публика. Поради епидемијата на коронавирус, беше решено натпреварот да се игра пред празни трибини. Ова значи дека домашната предност на Валенсија во голема мерка исчезна и тимот нема да може да се потпира на своите лојални навивачи за да им помогнат во оваа тешка мисија.
Задачата на Шпанците не е лесна. Досега само четири пати тим успеал да продолжи понатаму, откако загубил со три или повеќе голови разлика во Лигата на шампионите. Уште повеќе, Валенсија не може да се пофали со особено добра форма во моментот и има добиено само еден од нивните последни седум натпревари во сите натпреварувања.
Аталанта во последно време е во одлична форма, со четири победи во сите натпреварувања. Но, проблем за тимот може да биде фактот што тие немале официјален натпревар од 1 март, кога го совлада Лече со 7:2. Од друга страна, исто така тоа може да игра позитивна улога и да им даде шанса на играчите да се одморат, да останат свежи и да се подготват што е можно подобро за денешната средба.
Во составот на Валенсија за денешниот натпревар ќе недостасуваат повредените Есекиел Гарај, Кристијано Пичини и Максимилиано Гомез, како и казнетиот Габриел Паулиста. Неизвесни до последен момент ќе бидат Елјаким Мангала, Френсис Коклен, Мануел Ваљехо и Родриго. Тоа го прави изборот на тренерот Алберт Селадес многу ограничен и тој ќе ја има тешката задача да го состави најдобриот тим.
Од друга страна, Аталанта нема скоро никакви проблеми со изборот на играчи за оваа средба, единствено Рафаел Толој се жали на повреда на мускулот, но шансите тој да игра се добри.
Можни состави:
ВАЛЕНСИЈА: Силесен, Вас, Диакаби, Мангала, Гаја, Торес, Кондогбија, Парехо, Солер, Гедеш, Гамеиро
АТАЛАНТА: Голини, Паломино, Калдара, Џимсити, Хатебур, Де Рун, Фројлер, Госенс, Гомез, Иличиќ, Запата
Натпреварот на стадионот „Местаља“ започнува во 21 часот, а ќе го суди Овидиу Хацеган од Романија.

