Два гола на Луис Суарез и помогнаа на Барселона да го победи Интер со 2:1 на „Камп Ноу“ и да ја запише својата прва победа во Лигата на шампионите во новата сезона.
Тренерот на Барселона, Ернесто Валверде зборуваше за квалитетот на ривалот, но не штедеше комплименти за неговиот тим, што одигра на високо ниво во второто полувреме.
„Според мене, резултатот е заслужен, според тренерот на Интер веројатно не. Денес се соочивме со одличен тим, кој ја докажа својата класа во првото полувреме. Продолживме да ја баравме победата по лошиот старт и ги постигнавме головите што ни беа потребни“, рече Валверде.
„Не случајно Интер има 6 победи од 6 натпревари во Серија А. Тие го постигнаа голот од својот прв опасен напад. Потоа направивме неколку измени, го зголемивме темпото и тоа беше голема разлика“, истакна тренерот на Барса.
„Знаеме дека Меси е уникатен и е во состојба да го смени текот на секој натпревар. Тој не е во својата најдобра физичка форма, но постојано напредува. Видовме каква беше негова асистенција за вториот гол, па тој тешко да одигра лошо“, заврши Валверде.