Најтрофејниот македонски фудбалски клуб Вардар вечерва го продолжува настапот во евро-куповите. Црвено-црните гостуваат во Лозана во рамки на второто квалификациско коло од Конференциската лига на УЕФА, а на овој натпревар ќе ја бранат предноста од првата средба во Скопје.
Вардар дојде до победа против Лозана во Скопје со 2:1 и имаат еден гол предност пред вечерашното гостување. Головите на Роџерс Мато и Азер Омерагиќ покажаа дека противникот е ранлив и дека со ист рецепт и пристап во Швајцарија може да се надеваат на позитивен резултат на реваншот.
Во ист состав, Вардар отпатува за Швајцарија. Останува дилема дали капитенот Горан Закариќ ќе биде во стартниот состав или ќе чека шанса од клупата, нешто што беше случај на првиот меч во Скопје. И на овој меч за Лозана со сигурност надвор од тимот ќе остане Енцо Кана-Бијик. Се работи за 18-годишен центарфор кој во швајцарскиот тим е на позајмица од Манчестер Јунајтед. Играчот се повреди пред првиот меч со Вардар, а ќе биде надвор од терените осум недели заради повреда на коленото.
Мечот во Швајцарија започнува вечерва од 20:15 часот, а победникот од овој двомеч ќе игра со подобриот од дуелот на Зимбру од Молдавија и Астана од Казахстан, нивниот прв меч заврши 1:1.

