Голгетерот број 1 во историјата на англиската репрезентација и Манчестер Јунајтед, Вејн Руни веќе официјално е фудбалер на американскиот клуб Ди Си Јунајтед. Тимот од МЛС Лигата објави на клупскиот сајт дека постигнал договор со Евертон за трансферот на 32-годишниот напаѓач. Договорот на Руни со неговиот нов клуб е три и пол години.
„Фантастично е што се приклучувам на Ди Си Јунајтед во толку возбудлив момент од историјата на клубот, кога новиот стадион ќе биде отворен по неколку недели”, изјави Руни, цитиран од официјалниот сајт на клубот од Вашингтон. „Доаѓајќи во Америка и МЛС Лигата, направив уште еден амбиционен потег во мојата кариера. Гладен сум за успеси тука и ќе дадам се за Ди Си Јунајтед – како и секогаш сум правел за секој тим, чија дрес сум го носел “, изјави за клубскиот сајт Руни.
Вејн Руни ја започна својата професионална кариера во Евертон во 2002 година, кога имал само 16 години. По 13 сезони во Манчестер Јунајтед минатата година се вратил во неговиот матичен клуб. Тој има 119 натпревари и 53 гола за националниот тим на Англија, како и 253 погодоци во 559 натпревари за Манчестер Јунајтед.