По три дена исполнети со спортски приказни, големи имиња, средби, панели и разговори, во Сараево заврши јубилејното 15. издание на SIMPOSAR, еден од најзначајните спортско-медиумски собири во регионот.
Од 18 до 20 септември, Swissôtel Sarajevo беше место на кое се сретнаа спортски легенди, тренери, поранешни и актуелни спортисти, спортски функционери, новинари и луѓе од светот на бизнисот од повеќе од 20 земји. Спортско радио 90.3 FM и Derbi.mk беа во Сараево и одблиску го следеа јубилејното издание на SIMPOSAR. Едно од најголемите имиња на годинашниот собир беше легендарната американска атлетичарка Џеки Џојнер-Керси, трикратна олимписка шампионка и освојувачка на шест олимписки медали.

Но SIMPOSAR понуди многу повеќе од присуството на големи спортски имиња. Хасан Салихамиџиќ ја раскажа својата фудбалска приказна – од Јабланица до Баерн Минхен, Јувентус и самиот врв на европскиот фудбал. Надин Кеслер зборуваше за лидерството и иднината на женскиот фудбал, Дамир Скомина за одлуките и притисокот со кои се соочуваат судиите на најголемата сцена, додека Сергеј Барбарез ја отвори темата за одговорноста на селекторската функција и предизвиците со кои се соочува репрезентацијата на Босна и Херцеговина.
Посебно внимание предизвикаа и разговорите за лидерството и тренерската професија, со учество на Вахид Халилхоџиќ, како и приказните на фудбалските легенди од некогашниот југословенски и денешниот регионален фудбал. Токму тука SIMPOSAR имаше и силен македонски печат. Легендарниот македонски фудбалер Вујадин Станојковиќ на јубилејниот SIMPOSAR доби награда за животно дело, признание за неговата кариера и придонес во фудбалот. Станојковиќ беше и дел од еден од најинтересните разговори на собирот, заедно со Вахид Халилхоџиќ, Блаж Слишковиќ и Томислав Ивковиќ.

Македонската фудбалска легенда зборуваше за своите години во Вардар и репрезентацијата, за Ивица Осим и за времето на една голема фудбалска генерација. Се вратија спомените на Светското првенство во Италија 1990, натпреварот со Аргентина, пеналите, Марадона и приказните кои останале зад телевизиските камери. Но јубилејниот SIMPOSAR не живееше само од спортската историја. Една од темите беше и иднината – вештачката интелигенција и начинот на кој новите технологии веќе го менуваат спортот, од анализата и тренерската работа до одлуките и создавањето на новите генерации навивачи.
Имаше место и за кошарката, esports, спортскиот бизнис и лидерството, но можеби најголемата вредност на SIMPOSAR повторно беа средбите и разговорите меѓу луѓето кои спортот ги поврзува без оглед од која земја и генерација доаѓаат. По 15 изданија, идејата на основачот и директор на SIMPOSAR, познатиот спортски новинар Сабахудин Бахо Топалбеќиревиќ, прерасна од регионална иницијатива во меѓународен спортски собир кој секоја година во Сараево носи големи имиња и нови спортски приказни.

За Спортско радио 90.3 FM и Derbi.mk, присуството во Сараево беше можност од прва рака да бидеме дел од тие средби, да разговараме со луѓето кои оставиле белег во спортот и повторно да ја почувствуваме онаа негова страна која често е поважна и од резултатот – спортот како мост меѓу луѓето и земјите од регионот.

Завесата на јубилејниот SIMPOSAR 2026 е спуштена. Од Сараево остануваат бројни приказни, нови познанства и пријателства, спортски спомени и пораки кои вреди да се пренесат. А за нас, посебно останува и македонскиот момент – големото признание за Вујадин Станојковиќ, наградата за животно дело на јубилејниот 15. SIMPOSAR.

