Шпанскиот мотоциклист Хорхе Мартин доживеа тежок пад за време на спринтерската трка за Големата награда на Австралија во Мото ГП шампионатот, на патеката „Филип Ајленд“. Возачот на Априлија се бореше за победата со Марк Маркез кога ја загуби контролата врз мотоциклот во осмиот свиок, пет круга пред крајот.
Мартин со голема брзина излета во зоната со чакал, по што мораше да биде пренесен на носилки во медицинскиот центар на патеката. Рендгенските снимки потврдија скршеница на радиусот на десната рака, а постои сомнеж и за дополнителна фрактура на улната.
Од Априлија потврдија дека Шпанецот ќе мора да помине дополнителни медицински прегледи за да се утврди целосниот обем на повредата. Воедно, веќе е потврдено дека нема да настапи на неделната главна трка за Големата награда на Австралија.

