Вардар го очекува последниот натпревар од групната фаза на Лигата на шампионите, в сабота (17:30 часот) во Скопје го пречекува Монпеље, во мечот во кој ќе се обиде да дојде до 5. место на табелата во групата Б во Лигата на шампионите. Во таборот на Вардар се соочуваат со многу проблеми пред оваа средба, а на денешната прес-конференција за тоа зборуваше и тренерот Стевче Алушовски.
„Не очекува тежок натпревар. Нашата примарната цел беше пласман во Топ-16 и ја остваривме на претходниот меч со Мотор Запорожје. Ќе се обидеме да победиме. Ние сме Европски шампиони, играме пред домашна публика, мотивацијата не недостига, но имаме проблеми со ростерот. Тројца играчи неделава боледуваа од вироза, беше тешко да направиме тренинг, тоа нема да биде изговор и оправдување. Што се однесува до противникот, направивме анализа, но немаме доволно квалитетни опции за одбрана 6-0, па ќе се обидеме нешто со 5-1 и ќе се бориме максимално за секоја топка. Само така така може да се надеваме на победа. Нема да излеземе со бело знаме, но краткиот ростер и многуте здравствени проблеми се тие кои ставаат во тешка ситуација“, истакна Алушовски на денешната прес-конференција.
Капитенот на Вардар, Стојанче Стоилов, досега никогаш не му дал на противникот да биде „апсолутен фаворит“ кога играле во својата сала и пред својата публика. Сепак моменталната ситуација во редовите на неговата екипа го натера да му ја даде фаворитската улога на противникот.
„Ситуацијата е таква каква што е. Монпеље е апсолутен фаворит на оваа средба, а наше е да дадеме сè од себе и да пробаме да ги изненадиме“, кратко изјави капитенот на Вардар, Стојанче Стоилов.