Тренерот на Вардар, Иван Чупиќ, откри дел од тактичкиот план со кој неговиот тим стигна до убедлива победа над Еурофарм Пелистер во првото сезонско дерби.
Хрватскиот стратег истакна дека клучот бил во цврстата одбрана, подобрата транзиција и падот на концентрацијата кај битолчани.
„Знаевме дека ако одиграме добар натпревар и имаме фокусирана одбрана, ривалот ќе падне. Нашиот квалитет дојде до израз. Очекувавме противникот да има пад на концентрацијата и знаевме дека треба да бидеме трпеливи, да ја чекаме нашата шанса и да ја искористиме“, истакна тренерот на Вардар.
Чупиќ потенцираше дека победата е заслужена, а тимот покажал дека има желба да ја одбрани шампионската титула.
Вардар со триумфот над големиот ривал ја продолжи победничката серија во домашното првенство и остана на врвот на табелата.

