Вардар в среда ќе го пречека ППД Загреб во клучниот натпревар оваа сезона во Лигата на шампионите. Со победа вардарци би се вратиле на едно од местата кои водат во нокаут фазата, па така овој дуел има огромно значење.
На прес-конференцијата пред дуелот зборуваше еден од најискусните во редовите на Вардар, Тимур Дибиров.
„Мислам дека ние сме многу среќни да играме дома во овој дел од сезоната. Очекуваме поддршка во сала на овој многу важен натпревар. Во добра серија сме, играме подобро од претходно. Имаме тежок распоред со многу патувања. Сепак, очекувам концентрација, да се држиме до планот и добро се подготвивме. Сметам дека ќе биде сè добро.
Загреб е екипа која има голем респект од нас. Тие ги победија ПИК Сегед, се знаеме со Загреб и знаеме колку ни се важни двата бода. Не зависи ништо од претходните натпревари, ќе има доста нервоза и борба, ама ако сакаме да одиме понатаму мора да победиш директен конкурент. Слично сметаат и во Загреб со сигурност за нас. И тие се во добра форма, ама се надевам дека ќе дојдеме до поволен резултат. Очекувањата дома се само на победа. Знаеме дека ќе биде тешко, но за нас важно е да победиме. Ќе дадеме се од себе за тоа.
Не е доволна само работата на тренерот како на Раул во ПСЖ, ним им недостасува нешто друго. Вујовиќ беше човек кој направи многу за спортот, работата е многу тешка. Ние добро тргнавме со него, а потоа бевме во криза. Тоа не е вина само на Вујовиќ, туку на сите. Сега ги средивме проблемите и ситуацијата е подобра. Се е во наши раце, ако не е добро како што сме планирале, вината е на сите, а не на поединци. Ние можеме без секој, Вардар е голем клуб и мора да функционира без било кој. Во ова време може да ни отежнат болести и повреди, но сметам дека можеме да се кренеме и на ниво повеќе“, изјави Дибиров.
„Црвено-црните“ се надеваат дека со помош на својата публика ќе го совладаат еден од главните ривали за место во следната фаза.
Пресметката на Вардар и ППД Загреб е на програмата в среда со почеток од 20:45 часот во СЦ „Јане Сандански“.