Српскиот тренер Драган Николиќ (50 години) од денеска е нов тренер на МЗТ Скопје, откако потпиша договор до крајот сезоната со можност за продолжување на уште една.
Николиќ е добро познато име за македонската спортска јавност, со оглед што во сезоната 2016/17 повеќе од успешно го предводеше тимот на Карпош Соколи во АБА-лигата, каде што по стартот со осум порази по ред на крајот дојде до десет триумфи за пласман кон средината на табелата. „Соколите“ со Николиќ на клупата таа сезона дојде до историски триумф во Купот на Македонија и беше ривал на МЗТ Скопје во битката за шампионската титула.
Драган Николиќ има и македонски пасош со оглед на потеклото на неговото семејство од нашата земја, а згора на тоа негова сопруга е една од најдобрите македонски кошаркарки на сите времиња, Марија Видикова.
Николиќ се очекува денеска да пристигне во Скопје, а дебито на клупата ќе го има в петок на гостувањето кај Цибона во меч од 13. коло од АБА-лигата. Клубот од „Јане Сандански“ во моментов е последен на табелата во регионалното натпреварување со 2 победи и 10 порази.