Кошаркарот на Мајами Хит, Двејн Вејд, официјално потпиша нов договор со клубот, објавија од Мајами Хит на нивната официјална страница.
Договорот за трикратниот шампион на НБА лигата е за период од една сезона. Пред неколку дена, самиот играч објави дека ќе ја заврши својата кошаркарска кариера по завршувањето на сезоната 2018/19.
Двејн Вејд, кој во 2006 година ја освои наградата за „Најкорисен играч” (МВП) во финалната серија, е лидер во историјата на Мајами по постигнати поени (20 473), постигнати кошеви од игра (7 426), реализирани слободни фрлања (5 226), натпревари со двоцифрен број на поени (829), асистенции (5 009), украдени топки (1 433), одиграни натпревари (867) натпревари како стартер (845) и одиграни минути (31 027).
Просечниот учинок на Вејд во дресот на Мајами е 23,4 поени, 5,7 асистенции и 4,8 скока по натпревар. Во неговата кариера има и кратки настапи во екипите на Чикаго Булс и Кливленд Кавалирс.