Еурофарм Пелистер е спремен за европскиот почеток и првото коло од групниот сегмент на Лигата на шампионите. Вечерва во Битола гостува поранешниот европски првак и Загреб. Пред дуелот Еурофарм Пелистер – Загреб пред медиумите капитенот на македонскиот шампиот, Филип Кузмановски ги сподели своите очекувања:
„Среќен сум што ќе го пречкаме Загреб со најдобриот состав. Имавме неколку повредени ракометари кои изостанаа за пријателските натпревари и Суперкупот. Сега сите сме спремни и ќе го пречекаме Загреб. Лигата на шампионите сама по себе е голем мотив и ние ја заслуживме по ланската сезона. Максимално сме мотивирани, знам дека ќе имаме помош од нашите навивачи и очекувам полна сала“, вели Кузмановски.
РК Еурофарм Пелистер ја отвора својата фан-зона пред домашните натпревари од Лигата на шампионите. Денеска од 18:45 часот на платото пред спортската сала „Боро Чурлевски“ во Битола се подготвува забавно-музичка програма со вкусна храна и пијалоци.
Пред натпреварот навивачите ќе имаат шанса да си купат и нов дрес на македонскиот ракометен шампион.

