Македонскиот ракометен шампион Еурофарм Пелистер официјално се пофали со големо засилување во бековската линија. Нов играч на битолчани е репрезентативниот бек Филип Кузмановски, кој доаѓа директно од Бундеслигата, каде што настапуваше за Вецлар.
Само што се појави информација дека Кузмановски го раскина договорот со бундеслигашот, клубот од Битола го официјализираше потписот. Пелистерци се пофалија со ангажирањето на еден од најдобрите македонски ракометари, кој потекнува од Битола и веќе се врати во Македонија и потпиша договор со екипата на Еурофарм Пелистер.
На промоцијата беше присутен и тренерот Бранислав Ангеловски кој му посака добредојде назад во клубот на популарниот „Фитиљ“.
27-годишниот Кузмановски е дете на Пелистер, првите ракометни чекори ги направи во Битола и доби афирмација во родниот град. Потоа се пресели во Металург, кратко играше во Еурофарм Работник, па се одлучи за интернационална кариера. Кузмановски избра германски предизвик и ја искуси Бундеслигата.
Една сезона го носеше дресот на Магдебург, па три сезони настапуваше за Хановер, а од јануари годинава го носеше дресот на Вецлар и соработуваше со Филип Миркуловски кој беше дел од стручниот штаб.
Клубот го пријави Филип Кузмановски за натпреварите во Лигата на шампионите и негово деби се очекува в среда против ПИК Сегед во Битола.