Ракометарите на Еурофарм Пелистер вечерва го пречекуваат Нексе од Нашице во реванш осминафиналето во Европската лига на ЕХФ. Откако во Хрватска битолчани загубија со 29:26, сега пред своја публика мора да ги надокнадат трите гола негатива доколку сакаат пласман во четвртфинале.
Жељко Бабиќ знае како треба да се победи, а пред полна сала, бодрени од домашната публика во Битола, ќе се надигруваат со хрватскиот ривал. Добро за Еурофарм Пелистер е тоа што во тимот викендов се врати и капитенот Јосип Периќ, кој, иако не е спремен да понесе целосен товар, може да помогне во клучните моменти од дуелот. Гостите од Хрватска сериозно пристапуваат на овој натпревар па пристигна во Битола порано од планираното, доби одложување на натпревар во хрватското првенство и веќе во неделата дојдоа за да се аклиматизираат во Битола.
Традицијата не е на страната на битолчани. Во петте меѓусебни дуели Еурофарм Пелистер има две победи, додека ривалот од Нашице има три. Сепак, од домашната екипа очекуваат во пеколна атмосфера во Битола да се обезбеди победа со тоа што ќе ги анулираат трите гола дефицит од Хрватска.
Натпреварот меѓу Еурофарм Пелистер и Нексе Нашице е закажан за во 18:45 часот, а правдата ќе ја делат словачките судии Михал Бадура и Јарослав Ондогрекула.