Крилото на нашата репрезентација Гоце Георгиевски нема по добро да го памети настапот на СП 2023 во Полска и Шведска, затоа што нашиот национален тим доживеа три порази во групната фаза и че игра во Президент Купот.
Откако загубивме од Норвешка и Холандија, со висока разлика, верувавме дека против Аргентина можеме да играме и да се надеваме на позитивен резултат. Сепак тоа не се случи, а за мечот зборуваше Гоце Георгиевски кој вели дека загрижува што не се испочитувале работите кои претходно ги тренирале и договарале.
„Играта која ја имавме во квалификациите и пред почетокот на ова првенство, не ја испочитувавме ниту 10%. Имавме проблеми во одбраната, недоволна комуникација, проблеми во напад, недоволна концентрација, а тоа се доволен број на фактори кои влијаат за вакви резултати, посебно кога имаш вакви противници со кои е тешко да се надигруваш и веднаш те казнуваат. Мислам дека ние имаме доволно квалитет, ова Светско првенство е голем удар за нас, но мора да се издигнеме со главите горе и да се пласираме на ЕП 2024. Загрижувачки е фактот што немаме победа на последните две големи натпреварувања. Не го испочитувавме она кое го договаравме. Онаа игра која го красеше нашиот тим, не ја покажавме на ова СП“, рече Георгиевски.
Македонија утре се сели во Плоцк каде ќе настапува во Президен купот.