Македонската ракометна репрезентација ги започна подготовките за квалификациите кои ги започнува за ЕП 2028 година, а Дмитро Хориха веќе е дел од нашата ракометна репрезентација и денес првпат ја облече опремата на нашиот национален тим. Ракометарот на Сегед беше еден од присутните на денешниот собир на македонската ракометна селекција пред стартот на евро-квалификациите.
Хориха не криеше дека со големо задоволство ќе игра за Македонија на големите натпреварувања.
„Прв повик за селекцијата на Македонија. Ова е голема одговорност. Сакам да покажам колку сум спремен и да му помогнам на овој тим. Немаме многу време за подготовки, но јас ќе го дадам својот максимум на секој натпревар.
Голема благодарност за сите македонски навивачи. Вардар е причината што јас ќе заиграм за Македонија, поддршката од македонските фанови ја забележувам и сега. Сакам да играм за Македонија и ќе доаѓам секогаш кога ќе бидам повикан. Знам дека ќе чувствувам притисок, но ќе се справам со него. Има огромна разлика од ракометот и атмосферата во Македонија отколку во Украина“, рече новиот бек на Македонија, кој на крај откри дека ја учи македонската химна.
Репрезентацијата утре ќе се комплетира откако ќе им се приклучат играчите кои доаѓаат од Еурофарм Пелистер и Вардар, а потоа ќе се подготвуваат за натпреварите со Луксембург и Грција.

