Машката сениорска репрезентација на Македонија вечерва ги започнува мини-подготовките за претстојните квалификациски натпревари од Светскиот Куп во 2023 година.
Селекторот Драган Бајиќ, за вечерва од 19:00 часот, го закажа првиот собир кој ќе биде реализиран во СЦ „Борис Трајковски“, каде и ќе го играме следниот натпревар од групата Г од февруарскиот ФИБА прозорец.
Со оглед на краткото временско растојание, до одигрувањето на натпреварот од третото коло, закажан за 24 февруари во Тбилиси, против репрезентацијата на Грузија, сениорите ќе одработат уште еден тренинг, на 22 февруари (вторник) од 10:00 часот, исто така во големата сала во „Борис Трајковски“ во Скопје. Истиот ден, во вечерните часови, е предвидено заминувањето за главниот град на Грузија.