Екипата на Вардар 1961 и официјално го потврди ангажманот на новиот играч Косадин Петров. Клубот го комплетираше ростерот за пролетната полусезона во која ќе се натпреварува во Лигата на шампионите, СЕХА и Суперлигата на Македонија.
По заминувањето на Стефан Атанасовски на позајмица во Катар, клубот по истиот рецепт по кој дојде Стефан Додиќ од Охрид, доведе ново име на пикерската позиција. Вардар го официјализира трансферот на Костадин Петров од редовите на Металург. Кружниот напаѓач пристигна на позајмица до крајот на сезоната, а е второ и последно засилување на клубот оваа зима.
Вардар игра на три фронта, па поради тоа се реши за уште една аквизиција на линијата од шест метри. Петров ќе ја бара својата шанса за настап во конкуренција со капитенот Стојанче Стоилов, Жереми Тото и Патрик Валчак.
Низ кариерата Петров настапуваше за повеќе македонски екипи како што се Металург и Пелистер, а ги бранеше боите на шпанска Гвадалахара и романска Суцеава.