Нашиот ракометен бек, Филип Кузмановски, кој не е задоволен од состојбата во Металург а посебно од заостанатите долгови кон играчите, денеска во РФМ, поднесе барање за прекин на договорот со металурзите.
Според објавеното во дел од нашите портали, Кузмановски кој не се предомислил ниту по средбата со првиот човек на екипата од Автокоманда, Минчо Јорданов, сега ќе се насочи кон пронаоѓање на нов состав со кој ќе може да настапи и во Лигата на шампионите. Веднаш се појавија имињата на Вардар (како замена за повредениот Горбок) и на Загреб, кој го води неговиот поранешен тренер, Лино Червар.
Новиот ангажман на Кузмановски треба да биде во период од само една сезона бидејќи од наредната година тој ќе треба да го облече дресот на германскиот состав Магдебург доколку двете страни го испочитуваат првичниот договор. Кузмановски не е дел од експедицијата на Металург која замина во Белорусија на мечот со Мешков Брест закажан во раамките на СЕХА лигата.