Македонија е поразена и во вториот натпревар на СП во Полска и Шведска,денеска во Краков,Холандија беше пресилна за нашата репрезентација и славеше со убедливи 24:34.
Селекторот Кире Лазаров по натпреварот на прес-конференцијата потенцираше дека заслужено загубивме, но дека резултатот е превисок во однос на она како игравме и дека останува да одиграме добро против Аргентина.
„Холандија заслужи да победи и честитки за селекторот и ракометарите. Не сум задоволен како игравме на двата натпревари, иако знаеме дека противниците се подобри од нас. Направивме целосна промена на генерацијата и стилот на игра, но ќе сториме што можеме да се мобилизираме и да се обидеме да ја победиме Аргентина. Мора многу да зборуваме каде грешиме, да одмориме и добро да се подготвиме за натопреварот против Аргентина. Дојдовме тука по една победа и уште веруваме во неа. Мора да научиме многу од овој пораз. Холандија е поквалитетен противник од нас, но не за цели десет гола разлика. Мора да играме поколективно, а не како што денес игравме. Во еден период имавме -4 (18:22), за во 1 минута да примиме 3 гола и противникот повторно да се одлепи и да дојде до +10 во 55 минута од натпреварот. Може да се победи против поквалитетен тим, но мора да се покаже карактер. Вечерва го немавме тој квалитет. Имаме млади ракометари кои првпат играат на ваков турнир. Тој недостаток се чувствува во нашата игра. Атмосферата во екипата е добра, но очигледно дека не е така на теренот и ќе треба да работиме на тоа. За овие млади играчи е важно да одиграат уште три квалитетни натпревари со Германија, Србија и Катар, затоа ќе се обидеме да победиме во вторник против Аргентина“, рече Лазаров.