Македонија го загуби првиот натпревар на СП во Полска и Шведска, а селекторот Кире Лазаров по натпреварот,најнапред им честиташе на противниците, а потоа ја кажа и причината за убедливиот пораз од 39:27.
„Честитки за Норвежаните, заслужено победија и беа подобри од нас. Бевме добри дваесет минути во првото полувреме, но невозможно е да се игра шеесет минути на тоа ниво против една селекција која ја сметам за една од четирите најдобри на светот. Кога ќе направите 17 технички грешки во напад , тоа се 17 контранапади за противникот и нема помош. Тоа е причината што загубивме со дванаесет разлика. Бевме добри дваесет минути, а и во вториот дел ги изненадивме со играта „седум на шест“. Сепак, во пет минути грешките донесоа лесни голови за противникот, можевме да загубиме со 7, но еве загубивме со 12 голови разлика. Беше невозможна мисија да се вратиме во мечот, но ќе се подготвиме подобро за следните натпревари и ќе се обидеме да победиме против следните два противници. Ни следи Холандија која е моќна, но не е како оваа селекција на Норвешка. Што се однесува до Томи Јагуриновски, од медицинскиот тим добив инфомација дека е скочниот зглоб во прашање и имаше удар, но добро е што може да гази на ногата. Се работи за десната скочна нога, но Томи е голем борец и се надевам дека ќе биде добро за да ни помогне на следните натпревари“, изјави Кире Лазаров по натпреварот.