Ракометната репрезентацијата на Македонија денес ќе го одигра вториот натпревар на Европското ракометно првенство. Во „Феникс Арена“ во Дебрецин, противник на Македонија ќе биде селекцијата на Црна Гора.
Уште еден Балкански дуел од Групата А на ова ЕП, ова е натпревар кој може да биде клучен за останување во игра за пласман барем на 3-тото место во оваа група откако веќе загубивме на првиот натпревар со Словенија.
Подмладениот состав на Македонија без Кире Лазаров на терен на дуелот со Словенија покажа дека има сили да се бори со најдобрите. Словенците беа голем фаворит, но Македонија сериозно се спротивстави и малку недостасуваше да дојдеме до бод. Сепак, тој дуел го одлучија техничките грешки во нападот и искуството на противникот. И покрај загубениот натпревар, ме да не радува фактот дека на оваа средба одлично одиграа младите Цветан Кузманоски и голманот Мартин Томовски, одбраната беше на ниво и со корегирање на грешките во нападот може да се надеваме на пподобри резултати.
За дуелот со Црна Гора ситуацијата е различна, нашите ракометари на хартија се фаворити, па тоа на Црногорците им дава подобра позиција и помал притисок. Овој натпревар за двете репрезентации е можеби единствената шанса за бодови во групата затоа што Црна Гора веќе загуби од Данска, а ние ќе играме во понеделник. Во таборот на Црна Гора има неколку ракометари кои се познати на нашата ракометна јавност, пред се Мирко Радовиќ од Еурофарм Пелистер, како и Васко Шеваљевиќ, Василије Калуѓеровиќ, кои минатата година играа во Суперлигата на Македонија.
Без никакви дилеми, јасно е дека нашите ракометари сакаат победа со која само ќе покажат дека има потенцијал во овие играчи селектирани од Кире Лазаров. Македонија мора да заборави на сè што се случи пред два дена и да одигра како што знае за да ја победи Црна Гора. Нашите ракометари и вчера најавија дека сега мислат само на оваа средба и не прават никакви математики, едноставно треба најнапред да се добие овој натпревар.
Денешната средба во „Феникс Арена“ во Дебрецин против Црна Гора ја играме со почеток во 18:00 часот.

