Македонската ракометна репрезентација на крајот се најде на 15-то на Светското првенство во Германија и Данска. Во последниот натпревар од разигрувањето со многу проблеми ја совладавме селекцијата на Чиле со 32:30 (16:16).

Македонија добро го започна натпреварот и по неколку минути игра имаше предност од 3 гола разлика (6:3) но веднаш следуваше пад во играта кој го искористи Чиле и дојде до израмнивање. Во текот на поголемиот дел од првото полувреме бевме во предност со 10:8, 12:10 и 13:11, но во финишот од првиот дел дозволивме Чиле да направи пресврт и да дојде до водство од 14:16, но сепак со головите во последната минута од првото полувреме израмнивме на 16:16, резултат со кој се замина на одмор.

Во второто полувреме исто така Макеоднија беше таа која имаше предност, но на 10 минути пред крајот Чиле дојде до водство од 24:26, сепак нашите ракометари успеаа да израмнат набрзина и да го свртат резултато во своја корист. Во последната минута дојдовме до предност од 32:29 што беше предуслов за да славиме на крајот од натпреваарот со 32:30.

Најефикасни во нашата селекција беа Кире Лазаров со девет, Манасков со седум и Стоилов со пет гола, а кај Чилеанците најмногу голови постигнаа Ервин Фојчман, девет и Родриго Салинас седум погодоци.
Македонија со ова го повтори резултатот од претходното СП во Франција кога исто така бевме на 15-то место.


