Ракометната репрезентација на Македонија на стартот на Европското првенство ќе игра против Словенија, а потоа ќе се соочи со Црна Гора и Данска. Главната цел на селекторот Кирил Лазаров и неговите избраници е да се обезбеди пласман во втората фаза од шампионатот.
Марко Мишевски, специјалистот за одбрана во македонската репрезентација, најави дека тимот е подготвен за предизвиците кои ги носи турнирот во Словачка и Унгарија.
„Во овие последните неколку тренинзи работиме на сите ситни детали на нашата игра. Ја консолидираме одбраната, а секако работевме и на нападот. Тактички и физички сме подготвени, ги анализиравме сите наши ривали и во овие неколку дена ќе ги одработиме максимално сите зададени задачи од селекторот. Подготвени сме за стартот на Европското првенство“.
22-годишникот ги најави противниците на Македонија во групната фаза.
„Што се однесува до ривалите во нашата група, имаме одиграно доста натпревари со Словенија. Ги познаваме добро, тоа е селекција која има квалитетни играчи, кои играат главна улога во своите клубови во Лигата на шампиони. Исклучително силна репрезентација, можеби тие се фаворити, но ние секако дека се надеваме на позитивен резултат, бидејќи имаме свои адути, а секако и квалитет. Црна Гора исто така е квалитетна екипа. Тој двојбој во 2.коло ќе биде важен и за двете екипи, секако дека нема да ги потцениме. Ние ќе играме максимално на сите три натпревари во групата па така ќе биде и на оваа средба. Данска е светски шампион и можеби фаворит и за европскиот трон. Ние ги изненадивме во Скопје во квалификациите за ова Европско првенство. Мораме да веруваме во себе и овој пат“ изјави Мишевски.
Европското првенство стартува на 13 јануари и ќе се игра до 30 јануари, актуелен првак од пред две години е селекцијата на Шпанија.