Ракометната федерација на Македонија денеска на прес-конференција уште еднаш го најави одржувањето на женското Европско првенство во нашата земја. Претседателот Живко Мукаетов побара од навивачите и сите ракометни работници да учествуваат во организацијата на турнирот, со цел да се покаже дека државата е зрела за организација на вакви големи спортски настани.
„Би сакал да продолжиме да работиме заедно, како и досега, за да продолжиме да градиме подобар македонски ракомет. Нè очекува организација на Европско првенство. Би сакал на натпреварите да одиграме со срце, за Македонија. Би сакал да ги повикам навивачите да дојдат во што поголем број, да им дадеме поддршка на нашите девојки на овој турнир. Се надевам дека ќе докажеме дека сме сплотени. Да докажеме дека сме добри домаќини и дека Македонија е подготвена да направи нешто специјално и да покажеме што значи спортот број еден во нашата земја“, порача Мукаетов.
На прес-конференцијата зборуваа и Амбасадорот на првенството, Гордана Нацева и селекторот на машката ракометна репрезентација, Кирил Лазаров.