Само ден по мечот со Порто во ЛШ, ракометарите на Вардар денеска на прес-конференција го најавија утрешниот дуел со Нексе во СЕХА лигата. „Црвено-црните“ во ова натпреварување веќе имаат еден пораз од Мотор на гостински терен и во никој случај не смеат да си дозволат кикс дома.
Крилото Тимур Дибиров добро го познава Нексе и во пресрет на мечот најавува тежок дуел.
„Нексе не е наивна екипа иако загубија во првите две кола, останаа без важни играчи како Шипиќ, имаат причина за лошиот старт. Секогаш незгоден противник за нас, секогаш беше тесно, негуваат своја игра. Нема да биде лесно иако сме фаворити“, вели Дибиров.
Тренерот Писонеро потенцираше дека и на овој меч шанса ќе добијат најголемиот дел од ракометарите во ростерот.
„За кратко време играме нов меч, ќе биде исцрпувачки, сакам да им дадам шанса на сите играчи, сакам повеќе да ги менувам пивотите. Ќе видиме како ќе се одвиваат работите на теренот, но како што кажав сакам да одморат дел од ракометарите бидејќи имаме набиен распоред“, рече Писонеро.