Ракометарите на Норвешка одиграа одлично во „малото финале“ со Словенија и победија со 28:20, со што успеаа да го освојат бронзениот медал на Европското првенство (ЕП) кое се игра во Австрија, Шведска и Норвешка.
По поразот од Хрватска во полуфиналето, Норвешка мораше да се помири со фактот дека треба да игра само за бронза, но одигра квалитетно во текот на целиот натпревар и во ниту еден момент не дозволи Словенија да се понадева на победа на оваа средба.
Најдобар кај победничката селекција беше Јондал со седум гола, Бјорнсен постигна пет, а Сагосен и Јохасен имаа по четири, додека кај Словенија, Бомбач реализираше пет, а Мачковшек имаше четири гола. За Словенците ова беше втор најдобар пласман во историјата на Европските првенства, по второто место кое го освоија во 2004 година.

