По една недела тренирање со екипата на РК Вардар, Јапонецот Косуке Јасухира го потпиша едногодишниот договор со поранешниот шампион на Македонија, Вардар 1961. Откако беа завршени сите технички и административни формалности, средниот бек следната сезона ќе игра во дресот на „црвено-црните“.
Јасухира доаѓа како позајмен играч до Висла Плоцк, а македонскиот клуб има приоритет доколку сака да го откупи неговиот договор. Тој е првиот Јапонец што ќе биде дел од Вардар. Минатата година настапуваше и беше пријавен и за Лигата на шампионите. Не доби голема минутажа поради големиот број на играчи што настапуваа на таа позиција. Претходно играше и за француски Ник, и имаше натпревари и во Лига Европа.
Потекнува од јапонскиот Нипон Универзитет, игра како среден бек, поседува брзина и експлозивност. Веќе цела седмица тренира со Вардар, прво во Скопје а сега и во Маврово и веќе се вклопува во екипата.