Перо Антиќ и официјално ја објави и промовираше својата кандидатура за претседател на Македонската кошаркарска федерација (МКФ). Под името „Спортот на спортистите“, Перо Антиќ, ја презентираше програмата со која ќе се обиде да биде прв човек на МКФ.
Во конгресниот центар на СЦ „Борис Трајковски“, Антиќ прв ја најави својата кандидатура и излезе со своја програма и тим со кој најавува работа за подобрување на кошарката во нашата земја. Во тимот на трикратниот освојувач на Евролигата се уште Тодор Гечевски, како и поранешниот кошаркар Владимир Георгиевски.
„Мора да се почне од обезбедување на генерален партнер на лигите. Во завршни преговори сме, но пред се треба да поминат изборите за да се финализира тоа. Што би значело тоа? Тие котизации што се од секој клуб, таа сума да биде сведена на награден фонд, затоа што освен трофејот како задоволство, клубовите немаат добивка. Котизациите се многу високи, ќе ја намалиме за 20%, а во текот на мандатот ќе гледаме да се сведе на минимум. Исто е и за казните. Казни мора да има, но не треба да биде дека федерацијата живее од тие казни. Мора истите да ги намалиме, а дел од нив да бидат со 50% пренасочени во сите други здруженија. Сакаме и финансиски стимул во женската кошарка. Ќе бараме од секој сектор да се даде поголем епитет за развој на женската кошарка, затоа што знаеме на кој стадиум ни е сега, а со инвестиција во женската кошарка, ќе имаме поголем напредок уште од стартот. Сакаме да најдеме и спонзор за опрема на клупско ниво, односно сите да можат да набават опрема за тренинг и натпревари. Со нашите врски и познанства, мислам дека Македонија ќе има една добра соработка со сите европски федерации“, изјави Антиќ при преставувањето на неговата програма.
Тодор Гечевски зборуваше за сениорските репрезентации. Легенда во мак-баскетот истакна дека целта на ова раководство доколку дојде на раководните функции ќе бидат младинските категории, како и континуиран настап на Македонија на Европските првенства, нешто што беше случај во минатото.
„Знаеме каде беше сениорската репрезентација. Учествуваше на неколку ЕП во континуитет, а сега сме во квалификации за квалификации за големиот собир. Ние како тим, сакаме да обезбедиме многу подобри услови за членовите на нашата репрезентација, односно подготовките да се одвиваат во европските спортски центри. За да имаме добри резултати, ни се потребни реномирани тренери од странство за едукација и за помош. Сакаме сите да бидат горди да го носат националниот дрес. Сакаме да бидат сигурни кога играат за Македонија. За да имаме сениорска репрезентација на такво ниво, мора да имаме и добри младински категории. Без нив нема ниту клубови, ниту репрезентација. Сакаме да дадеме голем акцент на развојот и на помош на сите младински школи, кои имаат во интерес да создадат нови репрезентативци и клупски играчи. Исто така, сакаме и објект кој ќе биде во корист на МКФ, а ќе се има сала, вежбалница и секакви услови, за младите кои сакаат да се занимаваат професионално со кошарка, да работат и да напредуваат. Тука ќе ги споменам и лигите. Сакаме генерален спонзор на лигата, кој би ги покрил трошоците на натпреварување, за да се намалуваат котизациите. Ќе ги искористиме сите наши врски и конекции како кошаркари, за македонските клубови да играат во Европа“, рече Гечевски.
Сега останува да видиме кој се ќе влезе во трка за претседателското место нво МКФ, покрај Перо Антиќ, а се очекува кандидатура да најави и Владимир Темелковски, актуелниот спортски директор во МКФ.