Ракометарите на Македонија одиграа нерешено со домаќинот Швајцарија (29:29) во последниот натпревар од „Жолтиот куп“ кој се играше во Винтертур.
Овој резултат за нас значеше освојување на второто место на пријателскиот турнир поради послаба гол-разлика од домашната селекција. Самиот натпревар на крајот донесе вистинска драма, а нашата репрезентација извлече реми во последниот напад со голот на Марко Митев.
Македонија повторно одигра лошо први и одлично второ полувреме, а Швајцарија беше таа која доминираше во првиот дел и на одмор замина со предност од 18:13.
Во вториот дел влеговме нешто посигурно во нападот, реализираа Ристески и Атанасијевиќ, а бркавме разлика која беше меѓу три и четири гола. Следуваше добра одбрана и реализации во нападот шти и донесоа на Македонија намалување на 25:24.
По одбраната на Томовски и добрата контра Иван Џонов израмни на 26:26, а следниот напад не го искористи Серафимов за водство. До крајот се играше гол за го, а благодарение на двата гола на Митев во последните два напади, Македонија остана непоразена и натпреварот заврши 29:29.

