Македонската ракометна репрезентација ја совлада селекцијата на Чиле на првата од двете меѓусебни пријателски средби во Скопје. Нашите репрезентативци славеа со резултат 25:21 (15:11).
Иако настапи со драстично изменет и подмладен состав, и без Кире Лазаров, Македонија релативно лесно се справи со Чиле. Само во првите десетина минути од средбата се играше релативно рамноправно, иако и тогаш Македонија имаше постојана предност.
Оваа ЕХФ недела селекторот Брестовац ја користи за подготовки за претстојните квалификациски натпревари против Данска во март и против Финска и Швајцарија во април, за пласман на ЕП 2022 во Словачка и во Унгарија. Втората меѓусебна средба со Чиле ќе се игра на 10 јануари.

