Ракометната репрезентација на Македонија денес ќе го одигра последниот натпревар на Светското првенство во Полска и Шведска. Избраниците на Лазаров откако не ја минаа групната фаза, остварија две победи на трите меча во т.н. Президент Куп, па денеска против Јужна Кореја ќе играат за 27. место на Мундијалот.
Селекцијата од Азија на дел од натпреварите на шампионатот покажа квалитет, па така избраниците на Кире Лазаров ќе треба максимално да влезат во натпреварот за да остварат поволен резултат.
Освен дуелите за пласман од 25 до 32 место, денеска почнува и нокаут-фазата во битка за медалите. Во четврфиналните дуели се 7 европски и само една афиканска селекција.
Актуелниот светски првак Данска за противник во четвртфиналето ја има селекцијата на Унгарија, додека светскиот вицепрвак и еден од домаќините на Мундијалот, Шведска за пласман во полуфиналето ќе се бори против Египет. Шпанија ќе ги одмери силите со Норвешка, додека Германија во четвртфиналето ќе се сретне со Франција.
Разигрување за 27 место
18.00 Македонија – Ј. Кореја
ЧЕТВРФИНАЛЕ:
18.00 Данска – Унгарија
18.00 Норвешка – Шпанија
20.30 Франција – Германија
20.30 Шведска – Египет