Женската ракометна репрезентација на Македонија утре во СЦ „Борис Трајковски“ со првиот меч против Франција го почнува настапот на ЕП чиј ко-домаќин е и нашата земја. Во исчекување на премиерниот дуел со фаворитот Франција, денеска на средбата со новинарите селекторот Љубомир Савевски ги изнесе своите очекувања од првенството.
„Се надевам ќе успееме да направиме чекор напред во играта во транзиција и преодот од напад во одбрана. Во вториот дел од подготовките работевме и на тактичките определби, иако негативно е што не успеавме да најдеме противник за пријателски средби. Дуелите со Франција и Холандија ќе бидат како припремен дел, бидејќи сите ја гледаат шансата против Романија. Иако се смета за „послаба“ репрезентација, ја гледав против Германија и не е така. Можеби не е толку брза во игра како првите две, сепак, важи за квалитетна селекција. Пред една година започнавме со припрема, во овој состав имаме четири кадетки, а планирани беа шест или седум. Тука има и јуниорки, како и други млади ракометарки. Задоволен сум од овој состав, се наѕира екипа која може да игра близу до стилот на светскиот ракомет. Со сигурност ќе имаме најмлад тим на турнирот“, вели Савевски.
Македонија утре од 18 часот ќе ја има премиерата на домашен терен на ЕП 2022 против Французинките.