Светската кошарка денес остана без едно од најголемите тренерски имиња, Душан Ивковиќ. Српските медиуми утринава ја пренесоа оваа тажна вест, за смртта на легендарниот кошаркарски стручњак Душан Ивковиќ. Големиот Дуда во својата кариера соработуваше со многу кошаркарски ѕвезди.
Поранешниот југословенски кошаркар, а потоа и селектор, кој има бројни успеси на меѓународната сцена почина утрово во болница во Белград по проблеми со белите дробови на 77-годишна возраст.
Душан Дуда Ивковиќ во својата богата кариера има и две евролигашки титули, како и три златни медали од европските првенства со Југославија, а еднаш го покори и светот. Покрај тоа, имаше уште многу одличја во својата четири децениска кариера. Во кариерата беше во младинската екипа на Раднички, а потоа доби шанса да го води Партизан, додека првиот интернационален предизвик на Душан Ивковиќ му беше грчкиот тим Арис.Своите најголеми успеси ги имаше со Олимпијакос, клуб со кој ја освои титулата во Евролигата.
Кариерата ја продолжи во АЕК, па ги водеше ЦСКА и Динамо од Москва, пред да се врати во Олимпијакос и заедно со нашиот кошаркар Перо Антиќ повторно да освои титула во Европа. Беше селектор на Југославија во моментите кога во оваа репрезентација главни ѕвезди беа Петровиќ, Кукоч, Раџа, Дивац и останатите кои беа кошаркарски владетели во Европа во периодот од 1989 до 1991 година.