Двократниот европски првак Вардар денес промовираше уште едно од засилувањата на тимот за следната натпреварувачка сезона. Вардар започна една нова ера во своето постоење, со нова управа и поинаков концепт.
Последен од засилувањата и единствен кој не беше тука од стартот на подготовките е кубанскиот ракометар Хансер Микел Родригез.
21-годишниот лев бек со мало задоцнување се стави на располагање на тренерот Недановски, а го парафира и договорот со Вардар. Кубанецот се обврза на верност за наредните две сезони.
Се работи за универзалец, ракометар кој иако по вокација е лев бек, може да игра и како организатор на играта, меѓутоа и на левата крилна позиција. Родригез потекнува од Куба, меѓутоа неколку години играше во Португалија. Тој беше дел од Спортинг Лисабон, настапи и во Европската лига, а потоа настапуваше за Портимоменсе и минатата сезона за Брага.
Досега Вардар ги потврди потписите на договорите со Стефан Петриќ, Марко Срдановиќ и Матија Николиќ, па Хансер Родригез е четвртото официјализирано засилување. Со клубот веќе тренираат Косуке Јасухира и Нилтон Мело, а нивната промоција е очекувана во наредните денови.