Ракометарите на Вардар не само што се рекордери според освоените титули во СЕХА лигата, тие се сопственици и на најдолгата серија без пораз во ова натпреварување.
Вардар е тимот кој нема пораз во серија од 27 натпревари во СЕХА лигата. Црвено-црните” се единствениот тим што има серија од 27 натпревари без пораз. Натпреварот со Металург во првото коло од СЕХА Газпром лигата беше меч на кој по 26 пат победуваше нашиот шампион.
Во периодот од 13 декември 2016 година па досега, само еднаш ремизирале и тоа против Мешков на гостувањето лани во Белорусија, 25-25. Тоа беше натпревар веднаш по завршувањето на ЕП во Хрватска каде најголемиот дел од нашите ракометари настапуваа, а дел и во завршницата играа за медали.
Последен пат екипата на ППД Загреб триумфираше против Вардар на 13 декември 2016 година. Тогаш на гостувањето загубивме со 26-28. Зад Вардар со 25 натпревари без пораз е Веспрем. Тоа го постигнаа во првата сезона од нивното натпреварување во СЕХА (2015/2016) кога имаа 16 победи и две ремија (двете против Вардар) и плус уште седум победи во лседната сезона (2016/2017). Тогаш Вардар победи со 29-22 што беше воедно и највсиокиот пораз за Унгарците во СЕХА.
Лани „црвено-црните“ беа првиот тим што ја заврши сезоната со 17 победи во регуларниот дел, а потоа уште две победи на Ф4 турнирот.
Утре (вторник) Вардар е домаќин на натпревар од второто коло во СЕХА лигата против Железничар. Средбата се игра од 20,15 часот во СЦ “Јане Сандански”.