Ракометарите на Вардар го совладаа својот голем ривал во битката за титулата во Макеоднија, Еурофарм Пелистер со 31:24 (13:10) и со голема предност ќе го продолжат патот кон титулата во Суперлигата.
Натпреварот во СЦ „Јане Сандански“ беше одигран во добра атмосфера, која за жал беше прекината во првиот дел поради инцидентот што се случи по влегувањето на трибината на гостинските навивачи.
Првиот дел беше поизедначен, меѓутоа вардарци одлично го завршија првото со предност од 3 гола разлика (13:10), а исто така одлично го почнаа второто полувреме, период во кој се реши прашањето за победникот.
Стартот на второто полувреме понуди перфектна игра на Вардар. Голманот Томовски продолжи да ги брани ударите на битолчани, а од друга страна Манасков, Георгиевски, Дутра и Талески ја направија предноста првпат на плус седум (18:11). Во завршницата од натпреварот Пелистер успеа да намали на 5 гола, но не и да ја задржи таа негатива која на крајот изнесуваше минус 7, односно 31:24.
Во редовите на Вардар со по седум погодоци најдобри беа Филип Талески и Дејан Манасков, додека кај гостинската екипа Жарко Пешевски постигна пет гола.