Во пресрет на утрешниот меч со Нексе во рамките на четвртфиналето од СЕХА лигата, ракометарите на Вардар денеска на прес-конференција ги искажаа своитеочекувања. Тренерот Неданосвки и капитенот Стоилов веруваат во квалитетите на овој Вардар и се надеваат на пласман на Ф4 турнирот.
„Турнирот во Струга го искористивме како еден дел од подготовките за овој меч со Нексе. Имавме и добри и лоши моменти, сите играчи добија шанса, видовме кои играчи можат да понесат поголем товар, а за утрешниот дуел можам да кажам дека не чека дуел со еден одличен тим. Нексе пред неполни два месеци играше и Ф4 во Лигата на Европа. Имаа скоро ист состав, со двајца нови играчи. Добро воиграна екипа, не менува многу, играат одличен ракомет во последниве две сезони. Направивме анализа, немавме многу видео материјали од овој период, но се надевам дека направивме добри подготовки и се надевам на добар резултат на утрешниот дуел“, вели тренерот на Вардар, Владо Недановски.
„Форматот е таков, се игра само еден натпревар, кој го играме дома против противник кој одлично го знаеме. Тоа е тим кој не го менува ростерот често. Сега е еден натпревар и мислам дека имаме сили за победа. Имавме лимитирано време за подготовка, играме дома и се надевам дека ќе биде полна сала и со поддршка на навивачите да дојдеме до победата“, вели капитенот Стоилов.