Ракометарите на Вардар вечерва гостуваат кај лидерот во групата А во Лигата на шампионите, Монпелје во рамките на 11. коло на Лигата на шампионите.
Вардар ќе го одигра првиот натпревар од продолжението на сезоната во ова натпреварување со новиот предводник Давид Дејвис Камара. По поразот од Нексе во СЕХА лигата, Вардар предводен од Давид Дејвис победи против Пролет, Прилеп и Еурофарм Пелистер 2 во домашното првенство и Војводина во СЕХА лигата.
Голем проблем за вардарци и тренерот Дејвис е повредата на Анте Гаџа, кој заедно со Борко Ристовски остана во Скопје и не отпатува со екипата. Позицијата среден бек и онака беше проблем за Вардар, па со неиграњето на Гаџа, јасно е дека Дејвис ќе мора да импровизира. Од официјализација на трансферот на Додиќ сè уште нема ништо, па на гостувањето во Франција ќе биде навистина тешко без класичен среден бек.
Монпелје е голем фаворит во пресметката со Вардар. Македонскиот претставник во Лигата на шампионите е во серија од седум порази, која тргна токму од дуелот со францускиот тим во Скопје. Од тој натпревар Вардар имаше само порази, но без разлика на сето ова, од Вардар најавуваат дека нема да се предадат. Реално, најголема шанса за бодови Вардар ќе гледа на средбите со ППД Загреб, Мешков Брест и Елверум, преку кои ќе се обиде да обезбеди пласман во нокаут фазата на Лигата на шампионите.
Натпреварот меѓу Монпелје и Вардар 1961 е закажана за денес со почеток од 18:45 часот.