Ракометарите на Вардар денес ги очекува уште еден дерби натпревар во ЛШ, во Скопје гостува Барселона, а кога шпанскиот гигант доаѓа во СЦ „Јане Сандански“ секогаш салата е исполнета до последно место и има пеколна атмосфера.
Средбата се игра денес од 17 часот, капацитетот на салата е распродаден, а првпат сезонава беа пуштени во продажба и билети за стоење. Тоа значи дека големата сала во СЦ „Јане Сандански” ќе биде вистински вулкан.
Традицијата во однос на одиграните натпревари е на страната на Барселона, но сезонава Вардар повторно има квалитети со кој може сериозно да му парира на поранешниот повеќекратен европски шампион.
Победникот од оваа средба ќе се искачи на врвот на табелата на Група А, а со реми и двете екипи биле на првите две места.
Вардар ја има најдобрата одбрана во моментов во Лигата на шампионите. „Црвено-црните” примија само 155 гола на шест средби. Имаат гол разлика од „+18″. Вардар покажа дека промената на добар дел од ростерот не влијаеше на амбициите и на перформансите на екипата. Македонскиот тим има и две гостински победи оваа сезона, кај Веспрем и Монпелје.
Барселона од друга страна го имаше најдобриот напад пред почетокот на ова коло. Ја има и најдобрата гола разлика, од „+41″.
На дуелите во Скопје само еднаш победил Вардар, и тоа минатата година со 27:24 и еден натпревар заврши со реми, 29:29. Но, досега најважниот триумф Вардар го имаше во 2017 година на Ф4 турнирот во Келн кога во полуфиналето на ЛШ победи со 26:25.
Почнувајќи од 2013 година „вардарци“ одиграа седум средби со Барселона, и двапати победија, еднаш беше нерешено, а четирипати триумфираше Барселона.