Ракометарите на Вардар ги започна подготовките за пролетниот дел од сезоната, во кој клубот го очекуваат настапи во Супер лигата и во Лигата на Европа. Под водство на тренерот Иван Чупиќ, црвено-црните го одржаа првиот тренинг во Скопје, со кој официјално беше означен стартот на подготвителниот период. Во овој дел од сезоната, Вардар привремено е без неколку ракометари кои се со своите репрезентации на меѓународни натпреварувања. Десниот бек Урош Митровик настапува за Србија на Европското првенство, додека голманот Милош Валах, пивотот Виктор Јанковски и десниот бек Марек Марчињак се дел од полската селекција. Средниот бек Николас Боно настапува за Аргентина на првенството на Средна и Јужна Америка.
„Сите знаеме дека првиот дел беше добар за нас, но сега следува она вистинското. Пред нас се битка за титулата во првенството, настапот во Европа, а тука е и Купот. За жал ќе мораме да работиме без репрезентативците. Ги нема Полјаците, ќе ги немаме и Митровиќ и Боно. Тузолана и Педро засега ќе работат посебно, Стојановски и Еспиња ќе работат со останатите, Лазаревски од декември е со нас. Се надевам дека на турнирот во Хрватска ќе бидеме комплетни“, вели Чупиќ.
Вардар ќе ги реализира подготовките во Скопје, а кон крајот на месецот, на 30 и 31 јануари, тимот ќе настапи на силен меѓународен турнир во хрватскиот град Лабин, каде ќе игра против словенечкиот Слован Љубљана, како и против хрватските екипи Сесвете и Загреб.
Првиот натпревар во продолжението од Супер лигата, Вардар ќе го одигра на 7 февруари против Куманово, додека на 17 февруари следи гостување кај Бенфика во првиот натпревар од осминафиналето во Лигата на Европа.

