По неочекуваниот пораз од Нексе во првото коло, актуелниот шампион ан Македонија, Вардар 1961 одигра одличен натпревар и сигурно славеше над српскиот првак Војводина со 26:16 на гостувањето во Нови Сад, во рамки на второто коло од регионалната СЕХА-лига.
„Црвено-црните“ до овој резултат дојдоа со одлично одиграно второ полувреме во кое тимот ја одигра најагресивната одбрана можеби во досегашниот дел од сезоната. Во првите триесет минути вардарци доста се мачеа да пронајдат вистински ритам, меѓутоа имаа предноста и контрола на играта и резултатот во текот на првиот дел кој го завршија во своја полза од 11:9.
Во вториот дел да следи феноменална игра во одбраната, а тоа ја натера Војводина во дваесет минути да постигне само два гола. Длабоката одбрана на Вардар, исто така и зоната 5-1 го принуди противникот да греши во нападите, а тоа се казнуваше со голови преку контри. На десет минути пред крајот македонскиот првак имаше двоцифрена предност (13-23), па веќе беше јасно дека победата ќе му припадне на Вардар, атоа му даде шанса на Давид Дејвис да ги види сите играчи на теренот. Најдобар стрелец кај Вардар беше Тимур Дибиров со седум гола од осум обиди, пред Оливие Њокас со четири. Кај голманите Томовски имаше четири, а Гогов три тодбрани. Кај домашната екипа најистакнат беше Јовица Николиќ со пет постигнати гола. Следен натпревар за Вардар во СЕХА-лигата е на 18 февруари, кога тимот гостува кај Нексе во Нашице.