Ракометарите на Вардар повторно покажаа дека знаат како да играат против големиот ривал Еурофарм Пелистер во домашниот шампионат и победија во првата пресметка во Супер лигата со 30:25.
На натпреварот одигран во СЦ „Јане Сандански“ во одлична атмосфера, домашната екипа уште од почеток покажа дека е решена вечерва да се радува на сите три бода и константно ја имаше предноста во текот на целиот натпревар. Вардар одлично го отвори натпреварот , направи предност од неколку голови разлика која ја чуваше и надградуваше, за да на одмор заминат со резултат 15:12.
Во вториот дел Вардар веднаш зголеми на 6 гола разлика, 19:13, предност која ја имаше неколку пати во текот на второто полувреме, а во еден период Еурофарм Пелистер за се закани и намали на 22:20. Сепак повторно во финишот од средбата повеќе концентрација и смиреност имаше кај ракометарите на Вардар кои ја сочуваа предноста и на крајот славеа со 30:25.
Најдобри кај Вардар беа Милан Лазаревски и Марко Срдановиќ со по шест гола, а Матија Николиќ и Стефан Петриќ погодија по пет пати. Косуке Јасухира како плејмејкер заврши со четири гола, а голманот Мартин Томовски собра 13 интервенции. Кај Еурофарм Пелистер, Урош Борзаш имаше шест гола, сите во второто полувреме, пред Цветан Кузманоски и Ненад Костески со по пет реализации.