Португалија е следниот противник на Македонија на Европското првенство што се игра во Данска, Шведска и Норвешка.
Португалците во првото коло покажаа моќ против Романија, додека ние имавме меч со фаворитот Данска и имавме можност да се надигруваме со една од најдобрите селекции на ова ЕП.
Пред утрешниот натпревар на брифингот зборуваше и Мартин Велковски кој истакна дека добро им е познат квалитетот на Португалија.
„Не очекува Португалија, репрезентација на слично ниво со Данска. Видовме на минатото првенство дека поседуваат многу квалитет, стигнаа до самиот крај, но ние ќе ги анализираме нашите пропусти и грешки со Данска, ќе пробаме да ја подобриме нашата игра, се надевама овој натпревар ќе до дочекаме комплетни и ќе дадеме многу повеќе од соочувањето со Данците“, -рече Мартин Велковски кој се наврати и на вчерашниот меч и на позитивните работи и покрај поразот.
„Најголема позитива е одбраната и покрај тоа што примивме доста голови, бидејќи додека игравме на позициона зона не примивме многу голови, поголемиот број од погодоците ги примивме од нивна транзиција. Доста париравме и „тркачки“, не покажавме слабост кондициски, ротиравме добро и сме подготвени за Португалија.
Двете селекции играат слично затоа што и Португалија сака транзиција, играат на многу голови, тоа го видовме и против Романија. Играа модерен ракомет, ама ќе можеме да парираме на таа игра. Техничките грешки се проблем бидејќи при истите примаме контра голови, ако ги намалиме ќе биде многу полесно“, -изјави нашиот репрезентативен бек.

