Македонскиот ракометен шампион Вардар синоќа го имаше својот прв натпревар од новата сезона во Лигата на шампионите, а од Норвешка се враќа со освоен бод кај Елверум.
Вардар беше блиску до победа, но и до пораз, па можеби овој резултат 27:27 е најреален исход на овој натпревар. Тренерот Веселин Вуjовиќ на својот прв европски натпревар по враќањето во Скопје го прифати овој резултат како реален епилог на натпреварот.
„Ова беше цврст, борбен натпревар во кој ниту една екипа не успеа да се одлепи, не создаде поголема предност. Ремито е повеќе од реално. Му честитам на Елверум за тоа што го прикажа. Ние бевме подобри во првиот дел, Елверум во вториот и можеби нерешениот епилог е најреален. Во едно сум сигурен, многу тимови ќе загубат на овој терен. Ние немаме многу време за размислување, веднаш почнуваме со подготовки за следните натпревари“, изјави Вујовиќ по натпреварот со Елверум.
Вардар во второто коло од ЛШ го пречекува Мешков Брест, а веќе следниот викенд треба да го игра и првото дерби со Еурофарм Пелистер во домашното првенство.