Кошаркарите на Феникс го победија Далас со 107:105 во еден од најинтересните ноќешни натпревари на стартот на новата сезона во НБА лигата. Санс победија со поените на Демион Ли на 9,7 секунди до крајот, откако се вратија од негатива од 22 поени.
Девин Букер ги предводеше домашните со 28 поени и девет асистенции, додека кај Далас најефикасен беше Лука Дончиќ со 35 поени, девет скока и шест асистенции. Во последните моменти од средбата словенечкиот кошаркар промаши „тројка“ за победа. Кристијан Вуд додаде 25 поени и осум скока за Далас, а Спенсер Динвиди постигна 15 поени.
Новата сезона со победа ја започна и Чикаго кој го совлада Мајами со 116:108. „Биковите“ ги предводеше Демар Дерозан со 37 поени, од кои 28 постигна во второто полувреме. Кај Мајами, Џими Батлер постигна 24 поени со осум скока. Кошаркарите на Јута победија со 123:102 на домашен терен против Денвер, а дури седум играчи на Јута постигнаа двоцифрен број на поени. Најефикасен меѓу нив беше Колин Секстон со 20, додека Лаури Марканен постигна 17.
Во тимот на Денвер најефикасен беше српскиот репрезентативец Никола Јокиќ со 27 поени, шест асистенции, четири скока и три украдени топки.
Детроит – Орландо 113:109
Индијана – Вашингтон 107:114
Атланта – Хјустон 117:107
Бруклин – Њу Орлеанс 108:130
Мемфис – Њујорк 115:112 пр.
Мајами – Чикаго 108:116
Торонто – Кливленд 108:105
Минесота – Оклахома 115:108
Сан Антонио – Шарлот 102:129
Јута – Денвер 123:102
Фениск – Далас 107:105
Скраменто – Портланд 108:115